Ibinasura ng Korte Suprema ang petisyon laban kay Senador Francis “Chiz” Escudero kaugnay ng umano’y P30-milyong campaign donation mula sa isang government contractor na sangkot sa mga flood control project noong 2022. Hindi pinaboran ng Korte ang petisyon dahil sa “wrong remedy” o maling legal na hakbang ang isinampa ng petitioner.
Sa resolusyong inilabas ng SC En Banc noong Hunyo 3, 2026, ibinasura ang petisyon ng pribadong mamamayan na si John Barry Tayam na kumuwestiyon sa naging desisyon ng Commission on Elections (Comelec) na ihinto ang imbestigasyon laban kay Sen. Escudero.
Isinampa ni John Barry Tayam ang petisyon matapos ibasura ng Comelec-Political Finance and Affairs Department (PFAD). ang imbestigasyon laban kay Sen. Chiz Escudero. Paliwanag ng PFAD, walang sapat na ebidensya upang idiing lumabag sina Escudero at Centerways Construction and Development Inc. President Lawrene Lubiano sa Section 95 ng Omnibus Election Code.
Ang PFAD ang sangay ng Comelec na nagsusuri at nagbeberipika ng statements of contributions and expenditures (SOCE) ng mga kandidato sa halalan.
