Tiniyak ni Senate Sergeant-at-Arms Alfred Corpus na nakahanda na ang seguridad para sa pagsisimula ng impeachment trial ni Vice President Sara Duterte sa Lunes, Hulyo 6.
Ayon kay Corpus, nakipag-ugnayan ang Senado sa iba’t ibang unit ng Philippine National Police upang magdagdag ng mga tauhan na magbabantay sa buong pagdinig.
Sapat aniya ang bilang ng mga security personnel na ide-deploy sa loob at paligid ng gusali ng Senado upang matiyak na magiging maayos at ligtas ang takbo ng impeachment proceedings.
Samantala, maaari ring masaksihan ng publiko ang paglilitis sa pamamagitan ng pagpaparehistro sa Visitor Management System ng Senado.
Batay sa Secretariat, bubuksan ang online registration alas-2 ng hapon isang araw bago ang pagsisimula ng impeachment trial, at tatanggap ng mga bisita batay sa first-come, first-served na sistema.—sa panulat ni Jordan Gutierrez
