Handang-handa na ang House prosecution panel para sa nalalapit na impeachment trial ni Vice President Sara Duterte sa Lunes, Hulyo 6.
Sa ambush interview, sinabi ni House lead prosecutor at Batangas Rep. Gerville Luistro na matagal nang pinaghandaan ng prosekusyon ang paglilitis, noon pang 19th Congress.
Ayon kay Luistro, nakahanda na ang mga ebidensyang kanilang ilalatag, gayundin ang mga testigong magpapatibay sa impeachment case laban sa bise presidente.
Aniya, inaasahang sisimulan ang impeachment trial sa pamamagitan ng opening statements ng magkabilang panig, kasunod ang pagtalakay sa mga pending motions bago tuluyang dinggin ang mga ebidensya.
Gayunman, ipinaliwanag ni Luistro na hindi muna nila isasapubliko ang mga detalye o merito ng kaso bilang pagtalima sa mga patakaran ng Senate Impeachment Court.
Sa ngayon, patuloy na naghahanda ang public at private prosecutors habang hinihintay ang pormal na pagsisimula ng impeachment trial sa Senado sa Hulyo 6. | via Geli Mendez (Patrol 30)
