Inanunsyo ng Ateneo de Manila University na sinisimulan na nito ang pagsasagawa ng ulat alinsunod sa show cause order na inilabas ng Commission on Higher Education.
Ayon kay Ateneo spokesman Fr. Raymund Benedict Hizon, SJ, may inatasan na ang pamunuan ng unibersidad na mag-aasikaso sa pagtugon sa SCO ng CHED, at isusumite ito sa nakatakdang panahon.
Matatandaang binigyan ng CHED ang Ateneo ng sampung araw simula nang matanggap ng paaralan ang naturang SCO, na inisyu ng komisyon matapos ang pagkamatay ng mga student-athlete nito na sina Rene Baterbonia at Divine Adili.
Samantala, nanawagan naman ang mahigit tatlong libong estudyante ng Ateneo sa pamunuan nito na sibakin na sa pwesto ang Marketing and Communications head ng unibersidad na si Matec Villanueva.
Giit ng mga Atenista, nadidismaya sila sa kung paano hinawakan ng unibersidad ang krisis matapos ang pagkalunod nina Baterbonia at Adili, na nagdulot umano ng paglawak at pagkalat ng spekulasyon mula sa publiko. — Sa panulat ni Anjo Riñon
