Tuloy-tuloy sa pagbibigay ng tulong ang Kamara para tugunan ang pangangailangan ng mga biktimang naapektuhan ng magnitude 7.8 na lindol sa Mindanao.
Ito ang sinabi ni Akbayan Party-list Rep. Chel Diokno, kasabay ng paghahanda para sa nalalapit na impeachment trial ni Vice President Sara Duterte.
Ayon kay Diokno, nananatili sa isipan at konsensya ng mga mambabatas ang kalagayan ng mga apektadong komunidad sa Mindanao.
Aniya, bagama’t nasa gitna ng paghahanda ang Kamara para sa impeachment trial, agad na nagkaisa ang kapulungan upang maghatid ng tulong kung saan mahigit 100 kongresista na ang nangako ng donasyon at relief efforts sa pamumuno ni House Speaker Faustino Dy III.
Ang iba pa aniya ay mula pa sa kanilang sariling bulsa upang makatulong sa mga biktima ng sakuna.
Binigyang-diin ni Diokno na kayang gampanan ng Kamara nang sabay ang tungkuling konstitusyonal sa impeachment at ang tungkuling makatao para sa mga biktima ng lindol.
Sinabi pa ni Diokno na patuloy ang koordinasyon ng Kamara upang matiyak na makararating ang ayuda sa mga apektadong pamilya at komunidad, habang ginagampanan ang kanilang tungkulin sa lehislatura. | via Geli Mendez (Patrol 30)
