Naghain ng reklamong cyber libel at perjury sa Department of Justice (DOJ) si House Deputy Speaker at Iloilo 1st District Rep. Janette Garin laban kina Atty. Levi Baligod at mga nagpakilalang “18 Bag Man” at sinasabing dating bodyguard ni dating Cong. Elizaldy Co.
Batay sa complaint-affidavit ni Garin, paulit-ulit umano ang pagsisinungaling ng mga respondent sa kwestiyonableng pagdinig ng Senate Blue Ribbon Committee kung saan kumalat ang mga maling impormasyon na nakasisira sa kanyang reputasyon.
Ayon kay Garin, sa loob ng mahigit dalawampu’t walong taon niya sa serbisyo publiko, hindi siya kailanman nahatulan sa anumang krimen, lalo na sa anumang paglabag na may kaugnayan sa public fund, katiwalian, kawalang katapatan, o maling paggamit ng pondo ng gobyerno.
Bilang isang public servant, nanindigan si Garin na siya ay may prinsipyo at dapat mapanatili ang pinakamataas na pamantayan ng ethical conduct o mabuting pag-uugali.
Wala aniya siyang pinahintulutan, sinalihan, sinang-ayunan, o pinakinabangan na anumang iligal na gawain, partikular sa pera ng bayan.
Aniya, ang pampublikong pondo ay pag-aari ng sambayanang Pilipino at dapat gamitin lamang para sa kanilang kapakanan at ikabubuti.
Sinabi pa ni Garin na hinihintay nila ang testimonya at sinumpaang salaysay ng mga respondent, ngunit wala silang natanggap na kahit anong affidavit at ang tanging lamang nilang narinig ay ang mga alegasyong lumabas sa mga balita at social media.
Para kay Garin, hindi dapat hayaang magpatuloy ang pagpapakalat ng malalaking kasinungalingan na sumisira sa integridad ng mga opisyal ng gobyerno.
Nakasaad sa reklamo ang paglabag sa mga probisyon ng Revised Penal Code kaugnay ng libel at cyber libel, kasama ang mga probisyon ng Cybercrime Prevention Act of 2012 at reklamong perjury.
Layon ng isinampang kaso na hilingin sa mga prosecutor ng DOJ na magsagawa ng kaukulang imbestigasyon upang matukoy kung may sapat na batayan para sampahan ng kaso ang mga respondent. | via Geli Mendez (Patrol 30)
