Mariing pinuna ni Atty. Alex Lacson, Co-convenor ng Dapat Isa Lang ang House Bill 8389 na tinatawag na “Anti-Dynasty Bill,” dahil para sa kanya, hindi ito tunay na laban sa political dynasty.
Ayon kay Lacson, hindi nito tunay na pinipigilan ang pag-usbong ng mga pamilya sa politika. Sa halip, mas lalo pa umano nitong binibigyan ng puwang ang mga pamilya na makapag-okupa ng iba’t ibang posisyon sa gobyerno sa parehong panahon.
Ipinaliwanag niya na sa ilalim ng panukala, maaaring sabay-sabay na makapwesto sa gobyerno ang mga miyembro ng isang pamilya—gaya ng governor, congressman, mayor, at maging mga lokal na posisyon—hangga’t nasa magkaibang lugar o distrito.
Dahil dito, giit ni Lacson, mas tamang tawagin ang panukala na “pro-dynasty” kaysa “anti-dynasty,” dahil tila mas lalo pa nitong ginagawang legal at mas malawak ang sakop ng political dynasties sa bansa.
