Handa ang Philippine National Police na magbigay ng seguridad sa mga pamilya ng mga “missing sabungero” kasunod ng mga ulat tungkol sa umano’y panggigipit sa kanila at pakikialam sa nagpapatuloy na imbestigasyon ukol dito.
Ayon kay PNP Chief, Gen. Jose Melencio Nartatez Jr., hindi babalewalain ng pulisya ang mga alegasyong may mga kaanak ng mga nawawalang sabungero ang hinihikayat umano na huwag dumalo sa mga pagdinig.
Binigyang-diin ni Gen. Nartatez na iimbestigahan nila ang anumang uri ng pananakot o panunuhol.
Una nang inakusahan ng mga kaanak ng nawawalang sabungero ang ilang indibidwal na konektado umano sa kampo ng gambling tycoon na si Atong Ang na sinusubukan silang pigilan na dumalo sa mga pagdinig sa korte.
Kaugnay nito, kinumpirma rin ng hepe ng PNP na iniimbestigahan na ng mga otoridad ang mga ulat hinggil sa posibleng pagpupulong ng ilang kaanak at mga sinibak na pulis na dati nang iniuugnay sa kaso.
Ayon sa PNP, patuloy pa rin ang mga ikinakasang magkakahiwalay na operasyon para tugisin si Ang, na nahaharap sa mga kasong may kaugnayan sa pagkawala ng mga sabungero.
Nanawagan naman ang PNP Chief sa mga pamilya na agad ireport ang anumang uri ng pamimilit o pananakot sa kanila. | Jopel Pelenio (Patrol 17)
