Nilinaw ng veteran election lawyer na si Atty. Romulo Macalintal na may kapangyarihan si Pangulong Ferdinand Marcos Jr. na pumili ng kapalit mula sa mga kasalukuyang miyembro ng Senado o Kamara sakaling mabakante ang posisyon ni Vice President Sara Duterte.
Gayunman, hindi anya otomatikong magiging pangalawang pangulo ang mapipili ng punong ehekutibo, dahil kailangan pa itong aprubahan ng Kongreso sa pamamagitan ng magkahiwalay na botohan ng dalawang kapulungan.
Binigyang-diin naman ni Atty. Macalintal na sa sandaling masunod ang itinakdang proseso sa ilalim ng Konstitusyon, hindi na ito maaaring kwestiyunin sa Korte Suprema.
Samantala, ipinaliwanag din ng beteranong election lawyer na sakaling magbitiw si VP Sara habang gumugulong ang impeachment trial, hindi nito otomatikong mapapawalang-bisa ang proseso, lalo na kung layunin nitong matukoy ang posibleng diskwalipikasyon sa paghawak ng anumang posisyon sa hinaharap.—sa panulat ni Reabelle Medina
