Umabot na sa anim na dam sa Western Visayas ang nasa critical water level, habang walong dam naman sa Luzon ang nasa below normal water level dulot ng matinding init.
Ayon sa Philippine Atmospheric, Geophysical and Astronomical Services Administration o PAGASA, naitala sa San Roque Dam ang pinakamalaking kakulangan sa water level matapos bumaba sa 227.3 meters mula sa normal na 280 meters.
Samantala, nasa 177.05 meters na lamang ang antas ng tubig sa Angat Dam kumpara sa normal nitong 210 meters. Ang Angat Dam ang nagsu-supply ng malaking bahagi ng potable water sa Metro Manila.
Mababa na rin ang water level sa Ambuklao Dam na nasa 740.82 meters kumpara sa normal na 752 meters.
Kabilang naman sa mga dam sa Western Visayas na nasa kritikal na lebel ang Barotac Viejo River Irrigation System at Panakuyan R.I.S. Dam.
—sa panulat ni Reianne Antiquina
