Marami tayong naririnig na hinaing ng mga tao na nangangailangan ng pahinga o tulog, dala na rin ng pagod na nararamdaman sa araw-araw na buhay.
Pero ibahin mo ang lalaking ito mula sa Vietnam dahil kahit anong kagustuhan niyang matulog, hindi pa rin siya nakakatulog.
Kung paano nangyaring ni-literal ng bida ang katagang sleepless nights? Eto.
Kilalanin natin si Thai Ngoc na noo’y 80-anyos na magsasaka sa Vietnam ang napaulat na 63 taon na umanong hindi natutulog at hindi rin daw siya nakakaramdam ng antok o pagod.
Nagsimula umano ang ganitong sitwasyon ni Ngoc pagkatapos ng Vietnam War, ang giyera sa pagitan ng Vietnam at Amerika na nagsimula noong 1955 hanggang 1975.
Ayon sa pamilya ni Ngoc, matagal na panahon na no’ng huli nilang nakitang mahimbing na natulog si Ngoc.
Kahit anong pilit umanong matulog ni Ngoc ay hindi niya magawa kaya inaabala niya na lang ang kaniyang sarili sa pagsasaka at paggawa ng Vietnamese rice wine.
At kung minsan, nakakatulog daw ng isa hanggang dalawang oras si Ngoc kung iinom siya ng mahigit isang litrong rice wine.
Ayon kay Ngoc, nakakatulog pa raw siya kahit may giyera na nangyayari sa kanilang bansa pero bigla na lang daw siyang nahirapang matulog noong 1962.
Labis na ikinaaalrma ng asawa ni Ngoc ang kaniyang sitwasyon pero kalaunan ay tila normal na raw sa kanila na hindi natutulog si Ngoc.
Dinala na rin daw nila si Ngoc sa mga doktor pero kahit ang mga ito ay hindi maipaliwanag ang kaniyang sitwasyon.
Samantala, kahit hirap matulog si Ngoc, nananatili pa ring healthy ang kaniyang pangangatawan.
Marami ang nagsasabing maaaring epekto ng giyera ang sitwasyon ni Ngoc kung saan nagkaroon ito ng mental health condition na kung tawagin ay post-traumatic stress disorder o P-T-S-D.
Kung ikaw ang tatanungin, anong pipiliin mo? Ilang taong walang tulog o ilang taong walang gising?
