Aprubado na sa Senado ang pinakamalaking alokasyon para sa Department of Education sa buong kasaysayan ng bansa.
Sa bersyon ng Senado ng 2026 General Appropriations Bill, inaasahang makakakuha ng 1.044 trillion pesos ang DepEd, mas mataas ng 12.65 percent kumpara sa National Expenditure Program, at mas mataas ng 77.66 billion pesos sa inaprubahang budget sa Kamara.
Ilalaan ang 29.29 billion pesos para sa pagbili ng mga libro at iba pang learning materials; 28.66 billion pesos naman ang para sa mga school-based feeding program; at 3.77 billion pesos para sa disaster response at school safety efforts.
85.41 billion pesos naman ang nakatakdang ilaan para sa mga school infrastructure; tututukan din ng DepEd ang pagpaparami sa mga guro nito, ARAL Learning Recovery Program, at inclusive education programs.
Sa inilabas na pahayag ng DepEd, sinabi nito na isa itong pagpapakita ng pagtupad sa direktiba ni Pangulong Ferdinand Marcos Jr. na tutukan ang learning recovery, bumuo ng ligtas at mas maraming modern learning environments, at palawakin pa ang access sa de-kalidad na edukasyon.
