Ipinanawagan ni Bacolod Rep. Albee Benitez ang pagbuwag sa Department of Public Works and Highways bilang praktikal na solusyon para matuldukan ang sistematikong kurapsyon sa ahensya.
Kinuwestyon ng kongresista kung sapat na ba ang mga reporma para maayos ang DPWH o mas mainam na palitan na lamang ito ng bagong ahensya.
Ito’y sa gitna ng pagkakadawit ng ilang opisyal ng DPWH sa mga maanomalyang flood control project sa bansa, partikular ang nadiskubreng pakikipagsabwatan nila sa mga contractor at ilang mambabatas para makakuha ng kickback sa mga proyekto.
Sa hanay ng mga kongresista, kabilang naman sina dating House Speaker Martin Romualdez at Appropriations Committee Chairperson Zaldy Co sa mga nadadawit sa maanomalyang proyekto na kapwa naman nilang itinanggi.—sa panulat ni Mark Terrence Molave
