Tuluyan nang naglutangan ang mga pangalan ng mga kumpanya at contractors na sangkot sa mga flood control project, na ayon kay Pangulong Ferdinand Marcos Jr., kitang-kita naman na hindi maganda ang trabaho.
Pahayag ito ng Pangulo, matapos hingin sa Department of Public Works and Highways ang listahan ng mga flood control project sa nakalipas na tatlong taon.
Ayon kay Pangulong Marcos, layon nitong mapanagot ang mga nasa likod ng mga sub-standard, hindi nakumpleto, o ghost project, at ang mga nanamantala lamang sa pondo ng taumbayan.
Inaasahan pa ng Presidente na madadagdagan pa ang mga pangalan na ito, sa oras na maisapubliko na ang listahan.
Dahil ang taumbayan na aniya mismo ang kukumpirma kung nakikita o nararamdaman ba ng mga ito sa kanilang lugar ang mga flood control project na nakatala sa listahan.
