Handang-handa na ang Kamara para sa isasagawang impeachment trial laban kay Vice President Sara Duterte,
Ito, ayon kay House Spokesperson Atty. Princess Abante, ay matapos na nilang maisumite ang mga hinihinging karagdagang impormasyon ng Korte Suprema at patunayan na sumunod sa Konstitusyon ang impeachment proceedings.
Sinabi ni Atty. Abante na ang Office of the Solicitor General, bilang abogado ng Kamara, ang nagsumite ng kinakailangang dokumento online at naipadala na rin ito sa lahat ng kinauukulan, habang ang physical copy ay isusumite naman sa Korte Suprema.
Umaasa ang Kamara na masisimulan na ang paglilitis sa Bise Presidente sa Agosto a-kwatro.
