SA layuning mabigyan ng patas na digital na access ang mga malalayong lugar, pinangunahan ng Department of Information and Communications Technology (DICT) at Globe Telecom ang paglulunsad ng Bayanihan SIM initiative sa Kalawakan Elementary School, Doña Remedios Trinidad, Bulacan—isang Geographically Isolated and Disadvantaged Area (GIDA).
Dumalo si Globe Chief Commercial Officer Darius Delgado sa opisyal na paglulunsad ng Bayanihan SIM Project sa Kalawakan Elementary School sa Bulacan. Layunin ng proyektong ito na maihatid ang koneksyon sa isa sa mga pinakamalayong komunidad sa bansa, kung saan bawat benepisyaryo ay makatatanggap ng 25GB buwan-buwan.
Katuwang sa proyekto ang GCash, Department of Education (DepEd), Department of the Interior and Local Government (DILG), at Philippine Statistics Authority (PSA), na nagbigay suporta sa ceremonial launch kung saan 500 mag-aaral, guro, at magulang ang nabigyan ng TM SIM cards na may buwanang 25GB open-access data. Bukod pa rito, may dagdag na 5GB ang bawat SIM sa activation at posibilidad na makakuha ng karagdagang 15GB sa pag-load ng P150 kada buwan sa loob ng tatlong buwan.
Ang hakbang ay nakabatay sa Republic Act No. 10929 o Free Internet Access in Public Places Act, na layuning iangat ang antas ng edukasyon, kabuhayan, at akses sa pampublikong serbisyo sa mga liblib na komunidad.
Gamit ang SIM, maaari nang makapanood ng educational content ang mga estudyante, magsagawa ng digital classes ang mga guro, at makahanap ng kabuhayan online ang mga magulang gamit ang GCash at iba pang digital platforms.
Ayon kay DICT Secretary Henry Aguda, tugma ang proyekto sa utos ni Pangulong Ferdinand Marcos Jr. na siguraduhing “no Filipino is left offline.” Binanggit din na sa kauna-unahang pagkakataon ay magbibigay ang pamahalaan ng infrastructure subsidies sa mga telco para matugunan ang connectivity gaps sa mga GIDA.
Samantala, sinabi ni Globe President and CEO Carl Cruz, na sa ilalim ng programang ito, target nilang makapaglabas ng 1 milyong SIM cards na may 25GB data bawat isa, habang isinusulong ang paglalagay ng mga bagong cell towers sa mga lugar na kulang o walang signal.
Sa kabuuan, mahigit 333,000 indibidwal ang makikinabang sa Bayanihan SIM initiative sa buong bansa. Ito’y hakbang patungo sa isang mas inklusibong digital na Pilipinas, kung saan ang bawat Pilipino—nasaan man sa bansa—ay may kakayahang kumonekta, matuto, at umasenso.
