Umamin na gumamit ng ipinagbabawal na gamot ang babaeng si Rose Marie na naging viral matapos makuhanan ng video habang lumalabas mula sa imburnal sa Makati City.
Sa vlog na “Pinoy Pawnstars” ng kilalang content creator na si Boss Toyo ay ibinunyag ni Rose Marie na may bisyo siya ngunit hindi anya niya ito ginagawa araw-araw.
Isinangla niya ang isang cutter blade na ginagamit niya sa pamumulot ng karton at bote, na nahulog noon sa imburnal, na nagbunsod sa pagiging viral niya sa social media.
Aniya, hindi pa siya gumagamit ng ipinagbabawal na gamot noong may maayos pa siyang hanapbuhay.
Kamakailan, tumanggap siya ng walumpung libong pisong ayuda mula sa DSWD matapos mag-viral.
Patuloy siyang binabantayan ngayon ng lokal na pamahalaan at ng ahensya para sa agarang suporta at rehabilitasyon.
