Ibinalik na ng Land Transportation Franchising and Regulatory Board (LTFRB) ang orihinal o dating bilang ng mga unit ng bus na dumadaan sa Edsa Busway.
Ito’y matapos aprubahan ng LTFRB ang isang resolusyon na may layuning ibalik sa 550 ang mga unit ng bus dahil sa pagtatapos ng libreng sakay program ng pamahalaan at pagpapatupad ng “fare box.”
Batay sa inaprubahang resolusyon, maniningil na ng pamasahe sa mga pasahero ang mga bus driver gamit ang “fare matrix” o guidelines na ibinigay ng ahensya.
Dahil dito, kinakailangang kumuha ng mga bus operator ng “fare matrix” mula sa technical division ng LTFRB bago maningil ng pamasahe sa mga mananakay.
Matatandaang nagdagdag ng mga bus ang pamahalaan kung saan, umabot na sa 758 ang bilang ng mga unit nito.
Samantala, bilang pag-asista sa mga pasaherong sasakay ng bus, naglagay na ang LTFRB ng mga tarpaulin ng “fare matrix” o taripa para sa lahat ng mga bus station upang magabayan ang mga pasahero kaugnay sa tamang pamasahe.
