Isinusulong at palalakasing muli ng Department of Transportation (DOTr) ang modernisasyon ng mga Public Utility Vehicles (PUVs) matapos itong maantala noong panahon ng Administrasyong Duterte dahil na rin sa pag-usbong ng Covid-19 pandemic.
Layunin ng naturang modernisasyon na mapalitan ng bago ang mga lumang jeep at gumamit ng cashless payment system at GPS tracking device.
Ayon kay Transport secretary Jaime Bautista, ito ang mahalagang proyekto ng DOTr at nakikipagtulungan na aniya sila sa ilang grupong mayroong electric vehicles.
Una nang tinutulan ng ilang tsuper ng jeep ang nasabing programa dahil sa mahal na presyo ng modernized jeepneys.
Paliwanag ni Bautista, nakikipag-ugnayan na ang kanilang ahensya sa isang transport cooperative na nagnanais na mag-angkat ng mga electric mini buses mula sa China at hinihintay na lamang nito ang financial aid mula sa Landbank at Developing Bank of the Philippines.
Sa huling pagtatala ng DOTr, mayroon nang anim na libong modernized jeepneys ang nag-o-operate sa Pilipinas. —sa panulat ni Hannah Oledan