Ipinagtanggol ng tinaguriang “Lucky 7″ o mga kandidato sa pagka-Senador ng Partido Demokratiko Pilipino – Lakas ng Bayan (PDP Laban) – Cusi faction ang pag-endorso ng kanilang partido kay dating Sen. Ferdinand Bongbong Marcos Jr.
Ayon kay dating Presidential Legal Counsel Atty. Salvador Panelo, bukod sa pasok sa kanilang pamantayan sa ilalim ng 11 point agenda, tanging si Marcos Jr ang hindi kailanman bumatikos kay Pangulong Rodrigo Duterte.
Para kay dating House Deputy Speaker Rodante Marcoleta, sa lahat ng kandidato, si BBM lamang din ang tahasang nagpahayag na kaniyang ipagpapatuloy ang mga nasimulan ni Pangulong Duterte lalo na sa malalaking proyekto nito.
Para kay PDP Laban Membership Committee Chair at Senatoriable Astra Pimentel, nagkaisa ang mga miyembro na sundin at igalang ang naging pasya ng partido, sinuman ang kanilang dadalhin sa Halalan 2022.
Ganito rin ang pananaw ng Brodkaster na si Rey Langit at aktor na si Robin Padilla na naniniwalang dapat igalang ang naging pasya ng lahat dahil ito anila ay isang patunay ng pagkakaisa. —sa ulat ni Jaymark Dagala (Patrol 9)
