Hindi na kailangang kumuha ng pre-travel COVID-19 pass ang mga manlalakbay galing Thailand.
Ito ay bilang bahagi ng mga pagsisikap na muling buhayin ang sektor ng turismo na naapektuhan ng pandemya.
Mula Abril a-1 ay tatanggalin na ang requirement na makapag-presenta ng negative COVID-19 test result na kuha sa loob ng 72 oras ng paglalakbay.
Ayon kay Taweesin Visanuyothin, tagapagsalita ng COVID-19 task force ng Thailand, sa halip ay susuriin ang mga bisita pagdating sa kanilang bansa.
Kasalukuyang nagtatala ang Thailand ng humigit-kumulang 25,000 bagong kaso ng COVID-19 sa kada araw, ngunit umaasa ang mga opisyal na matatapos ito sa oras na lumipat sila sa isang yugto ng “post-pandemic” mula Hulyo. —sa panulat ni Mara Valle
