Apat na katao ang patay matapos sumalpok ang sinasakyang kotse sa isang puno at nagliyab sa Barangay Anquiray, Amulung, Cagayan.
Kinilala ang mga nasawi na sina Nicole Molina, drayber ng kotse, Oliver Taganna Jr., Benjie Pascual at Michael Indita.
Batay sa imbestigasyon ng pulisya, pauwi na umano ang mga biktima nang mawalan ng kontrol ang nasabing sasakyan kaya bumangga ito sa isang poste bago sa isang malaking puno.
Mabilis din na kumalat ang apoy sa sasakyan at wala nang nakalabas mula rito.
Samantala, natukoy ng mga otoridad ang pagkakakilanlan ng mga biktima mula sa kuha ng CCTV nang sumakay ang mga ito sa kotse. —sa panulat ni Airiam Sancho
