Patay ang isang ginang matapos na pagsasaksakin sa loob mismo ng kanilang bahay sa San Carlos City, Pangasinan.
Sugatan naman ang 20-anyos na anak nito na pinangalanang “Boyet” na suspek sa pananaksak.
Paliwanag ng suspek, pinasok sila ng mga magnanakaw ngunit ayon sa imbestigasyon ng mga otoridad, si Boyet mismo ang sumaksak at pumatay sa sariling ina, at pagnanakaw ang motibo sa krimen.
Kuwento ng isa pang anak ng biktima, nadatnan niyang parehong duguan ang kaniyang ina at nakatatandang kapatid.
Lumalabas naman sa pahayag ng mga testigo na mayroong hindi pagkakaunawaan ang mag-ina at nagseselos din umano ito sa kaniyang kapatid.
Sa ngayon ay nagpapagaling pa sa ospital ang suspek at nakatakdang sampahan ng kasong parricide. — sa panulat ni Hya Ludivico.
