Nananatiling nasa critical risk ang bed capacity para sa COVID-19 patients sa pinakamalaking Coronavirus referral center sa Mindanao.
Ayon kay Dr. Ricardo Audan, Hospital Chief ng Southern Philippines Medical Center (SPMV) nasa 89.13% ang ICU usage rate sa nasabing ospital na ang utilization rate ng ward beds naman ay naitala sa 84.07% kung saan 359 mula sa 427 COVID-19 beds ang okupado.
Sinabi ni Audan na karamihan sa mga pasyente nila ay matatanda, hindi pa bakunado at yung iba naman ay nakapagpa bakuna na ng first dose.
Samantala, nasa critical level din at halos okupado na ang COVID-19 beds ng Jose Lingad Memorial General Hospital sa San Fernando, Pampanga.
Ipinabatid ni Dr. Monserrat Chichioco, Medical Director ng nasabing ospital na tumaas ang na admit na COVID at COVID related cases sa kanilang ospital nitong mga nakalipas na araw.
Nakadagdag din aniya sa admission nila ang mga referral mula sa ibang pasilidad.
