Naitala ng Davao City ang kauna-unahang kaso nito ng Delta variant.
Ayon sa tagapagsalita ng Davao City COVID-19 Task Force na si Michelle Schlosser, kinilala ang nagpositibo sa naturang variant ay sa katauhan ng isang 28 taong gulang na babae.
Sumailalim ito sa swab testing noong Hunyo 26 matapos na ma-expose SDA isang asymptomatic COVID-19 patient sa kanyang pinagtatrabahuan.
Nitong sabado naman nang matanggap ng COVID-19 Task Force ng lungsod ang resulta ng surveillance test mula sa Philippine Genome Center (PGC) matapos itong gumaling at makakumpleto ng quarantine period.
Bukod pa rito, napag-alaman ding full-vaccinated na ang pasyente bago ito dapuan ng virus.
Kasunod nito, tiniyak ng awtoridad sa Davao City na muli nilang iimbestigahan ang naturang kaso at magsasagawa rin ng testing at isolation hanggang sa ‘3rd generation’ contacts nito.
Sa huli, hinimok ng COVID-19 Task Force ng lungsod ang mga residente nito na mahigpit pa ring sumunod sa umiiral na health protocols kontra virus.
