Wala pang dapat ipag-aalala ang mga customers ng Meralco na hindi pa nakababayad ng kanilang bill sa kuryente.
Ito ay dahil ayon kay House Speaker Lord Allan Velasco, pinalawig pa ng Meralco ang kanilang no disconnection policy hanggang sa January 31 2021.
Nangangahulugan itong hindi pa rin magpuputol ng linya ng kuryente ang Meralco sa mga customers nilang hindi pa nakababayad ng kanilang bill.
Sinabi ni Velasco, siya mismo ang humirit sa Meralco na i-extend ang kanilang no disconnection policy bilang pananatili ng espiritu ng bayanihan sa gitna ng pandemiya.
Aniya, malaki ang maitutulong ng naging pasiya ng Meralco para maramdaman ng mga Filipino ang matiwasay na pamumuhay sa panahon ng Kapaskuhan, sa kabila ng matinding epekto ng pandemiya at mga kalamidad.
Ani Velasco, Nobyembre ng sumulat siya kay Meralco President Ray Espinosa para ipaabot ang kanyang hiling na pinagbigyan naman nito sa pamamagitan din ng isang liham noong December 14.
