Aprubado narin sa ikalawang pagbasa ng Kamara ang House Bill 9305 o “Komprehensibong Alalay sa Livelihood, Inflation, Negosyo at Goods Assistance” o Kalinga Act., na magpapalakas sa kakayahan ng gobyerno sa mabilis na pagtugon sa pagtaas ng presyo ng langis, inflation, at iba pang krisis partikular sa enerhiya na nakaapekto sa kabuhayan at pangunahing serbisyo.
Sa ilalim ng panukala, maaaring magdeklara ng state of national emergency si Pangulong Ferdinand Marcos Jr., para tugunan ang krisis sa mataas na presyo ng krudo, gasolina, at problema sa enerhiya kung saan, apektado ang mababang suplay ng pagkain, transportasyon, at kabuhayan.
Sakaling maideklara ang state of national emergency, maaaring maglabas ang gobyerno ng agarang ayuda tulad ng cash assistance, food, at transport support, fuel subsidy, at iba pang tulong para sa mga mahihirap na pamilya, manggagawa, tsuper, mangingisda, magsasaka, at maliliit na negosyo.
Kasama rin sa panukala ang subsidiya sa kuryente, fuel assistance para sa sektor ng agrikultura, at pampublikong transportasyon, maging ang suporta sa delivery riders at operators ng online transport services.
Papayagan rin ng panukala ang pansamantalang pagsususpinde ng VAT at excise tax sa produktong petrolyo nang hanggang 60 araw upang mapagaan ang epekto ng pagtaas ng presyo ng langis sa publiko.
Bukod pa dito, magpapataw rin ng 15% windfall profit tax sa mga oil companies habang may umiiral na national emergency. | Geli Mendez (Patrol 30)
