Kumikita umano ng malaki mula sa “pastillas” scheme ang ilang Chinese translator na nagta-trabaho sa Ninoy Aquino International Airport NAIA.
Ito ang ibinunyag ni Immigration Officer Allison “Alex” Chiong na siyang unang nagbunyag ng anomalya sa paliparan.
Ayon kay Chiong, nagsisilbing liaison officers ang naturang mga interpreter sa pagitan ng immigration officers at Chinese nationals.
Bukod sa pakikipag sabwatan pa umano ng mga Chinese translator sa mga immigration official nagkakaroon din aniya ng iba pang raket ang mga ito.
Ang ilan umanong translator ay naglalagay ng maliit na sticker sa pasaporte ng mga Chinese national na nagbabayad sa kanila para sa madaling proseso ng kanilang pagpasok sa Pilipinas.
Tiniyak naman ni Immigration Commissioner Jaime Morente na sisiyasatin ang naturang alegasyon ni Chiong laban sa ilang translator sa paliparan.