Muling tiniyak ng Malakanyang na hindi aarestuhin si Communist Party of the Philippines (CPP) founding chairman Jose Maria Sison oras na umuwi ito ng Pilipinas.
Ito ang inihayag ni Presidential Spokesperson Salvador Panelo kasabay ng paggigiit na dapat gawin sa bansa ang one-on-one talk sa pagitan nina Pangulong Rodrigo Duterte at Sison.
Ayon kay Panelo, ginagarintiyahan ng Pangulo na hindi aarestuhin si Sison mula sa pagdating nito sa bansa hanggang sa makaalis ito pabalik ng Netherlands.
Una nang sinabi ni Sison na bukas siya para sa isang one-on-one-meeting sa Pangulo, gayunman hindi siya sang-ayong gawin ito sa Pilipinas.
Sinabi ni Sison, sa kabila ng paulit-ulit na pagtitiyak ng Pangulo na hindi siya aarestuhin, nakikita niyang hindi ito susundin ng mga security forces ng bansa.
