Iginarantiya ni PNP Chief P/Dir. Gen. Oscar Albayalde na kanyang itatalaga sa pwesto ang mga deserving ‘police officers’.
Ginawa ni Albayalde ang pahayag kasunod ng napipintong balasahan sa puwesto sa susunod na mga araw.
Bunsod nito, hiniling naman ng PNP chief sa kaniyang mga mistah na miyembro ng PMA Sinagtala Class of 1986 na ibigay ang kanilang 100 porsyentong suporta sa kanyang pamumuno sa pambansang pulisya.
Aminado naman si Albayalde na pressured din siya sa mga kaklase na lumalapit sa kanya lalo na kung may kaugnayan sa pwesto ang kanilang napag-uusapan.
Ngunit tiniyak naman ng PNP Chief na sa bawat itatalaga nya sa isang posisyon at bibigyan ng promotion ay dadaan sa masusing pag-aaral ng Oversight Committee at Senior Officers and Promotions and Placement Board o SOPBB.
