Patay ang HR officer ng Sulu Integrated Provincial Health Office makaraang pagbabarilin sa Jolo, Sulu.
Ayon kay Brigadier General Cirilito Sobejana, commander ng Joint Task Force Sulu nakilala ang nasawi na si Edmiraldo “Emerald” Sollano Wee na nagtamo ng tama ng bala sa kanyang ulo na naging dahilan ng agaran nitong pagkamatay.
Nabatid na sakay ng kanyang motorsiklo pauwi ng bahay ang 38-anyos na biktima nang pagbabarilin ng hindi nakilalang riding-in-tandem sa Barangay San Raymundo.
Kaagad namang rumesponde sa lugar ang special forces ng militar habang kinordon naman ng mga tauhan ng 35th Infantry Battalion ng Philippine Army ang Metro Jolo para sa posibleng pagkakaaresto sa mga suspek.
Nagpahayag naman ng pagkondena si Autonomous Region in Muslim Mindanao o ARMM Health Secretary Dr. Kadil Sinoliding Jr. sa pag-atake sa isa sa kanilang health worker.
Kasabay ng pagluluksa, hiniling nito sa mga awtoridad na kaagad mabigyan ng katarungan ang pagkasawi ni Wee.
—-
