Inabsuwelto ng Department of Justice (DOJ) sa kasong may kaugnayan sa paglabag sa Comprehensive Dangerous Drugs Act o Republic Act 9165 ang dalawa sa bigtime umanong drug lord ng Visayas na sina Peter Lim, Kerwin Espinosa at 20 iba pa.
Sa 41 pahinang resolusyon, ibinasura ng piskalya ang inihaing reklamo ng PNP-Criminal Investigation and Detection Group (CIDG).
Kabilang din sa mga otomatikong inabsuwelto ang iba pang respondent na sina Peter Co, Marcelo Adorco, Max Miro at Lovely Impal.
Nag-ugat ang reklamo ng PNP-CIDG sa pagkakasangkot umano ng grupo nina Lim, Espinosa at Co sa illegal drugs trade sa Visayas.
Naging batayan ng PNP-CIDG ang impormasyon na ibinunyag ni Adorco na umano’y pinagkakatiwalaang tauhan ni Espinosa, na sina Lim at Co ang supplier ng droga ng Espinosa Group.
Gayunman, hindi binigyan ng National Prosecution Service ng bigat ang testimonya ng testigo na tinawag nilang self-serving dahil hindi naman ito “corroborated” o sinusuportahan ng iba pang testimonya o ebidensya.
Pagkaka-abswelto sa drug case, ikinagalak ng negosyanteng si Peter Lim
Ikinagalak ng Cebuano Businessman na si Peter Lim ang pagkaka-basura ng task force on illegal drugs ng Department of Justice (DOJ) sa kanyang kasong drug trafficking.
Ayon kay Jun Fuentes, tagapagsalita ni Lim, nagpapasalamat ang negosyante sa paborableng desisyon ng D.O.J.
Una ng inihayag ni Justice Secretary Vitaliano Aguirre na ang Peter “Jaguar” Lim na kabilang sa mga bigtime drug lord sa bansa ay ang drug lord na si Jeffrey “Jaguar” Diaz at hindi ang kilalang negosyanteng Cebuano.
Hunyo 17 noong isang taon nang mabaril at mapatay ng mga pulis sa Las Piñas City si Jaguar na bigtime druglord sa Central Visayas o dalawang linggo bago maluklok sa Malakanyang si Pangulong Rodrigo Duterte.
(Ulat ni Bert Mozo)
