Walang plano ang Federation of Jeepney Operators and Drivers Association of the Philippines (FEJODAP) na iurong ang kanilang petisyon na itaas ang singil sa pasahe.
Binigyang diin ito ni FEJODAP President Zenaida Maranan sa kabila ng sunod-sunod na rollback sa presyo ng mga produktong petrolyo.
Maliban dito, sinabi ni Maranan na hindi rin napapanahon na tapyasan rin ang kasalukuyang P7.50 na minimum fare dahil pagdating ng Setyembre ay pataas na ang presyo ng langis.
Una rito, ipinatupad ng mga kumpanya ng langis ang ikawalong sunod na rollback sa presyo ng mga produktong petrolyo.
Kwarenta’y singko sentimos (P0.45) ang natapyas sa presyo ng diesel at gasolina at P1.00 naman sa kerosene.
“Huwag niyo na pong isipin na bawasan po kasi kumbaga ngayon lang nakakabawi ang ating mga tsuper sa kanilang kinikita sa pagbaba ng presyo ng krudo pero sa isang buwan ay makikita natin na magsisimula na namang tumaas ng tuluy-tuloy ang presyo ng krudo.” Giit ni Maranan.
By Len Aguirre | Balitang Todong Lakas
