Hinamon ng AFP o Armed Forces of the Philippines si dating Marawi City Mayor Solitario Ali na lumutang na kung totoong wala itong kinalaman sa nagaganap na giyera sa Marawi City.
Ayon kay AFP Spokesman Brigadier General Restituto Padilla, dapat harapin ni Ali ang inilabas na martial law arrest order ni Defense Secretary Delfin Lorenzana at linisin ang kaniyang pangalan.
Sinasabing si Solitario ang isa sa mga nagbigay ng pondo sa grupo ng Maute – ISIS na patuloy na nakikipagbakbakan sa puwersa ng pamahalaan.
Matatandaang sinabi ni Solitario na planong makipag – negosasyon ng grupong Maute sa gobyerno at nakahanda ang mga ito na palayain ang mga natitirang bihag kapalit naman ang ligtas na paglabas ng mga natitirang terorista sa loob ng Marawi City.
_____
