Hindi papasanin ng mga kampo nila Vice President Leni Robredo at dating Senador Bongbong Marcos ang upa ng COMELEC o Commission on Elections sa mga warehouse.
Ito’y ang warehouse na matatagpuan sa Sta. Rosa sa Laguna kung saan nakatago ang mga makinang ginamit sa mga nakalipas na halalan.
Ito’y ayon mismo sa Korte Suprema na tumatayo bilang PET o Presidential Electoral Tribunal makaraang paboran nito ang hirit ni Marcos na magsagawa ng recount sa balota ng ilang mga lugar na saklaw ng inihain niyang electoral protest laban kay Robredo.
Ayon sa PET, gagamitin lamang sa gastusin sa paghahatid ng balota sa tribunal gayundin sa kumpensasyon sa mga miyembro ng revision committee ang ibinayad na deposito ng dalawang kampo.
Hindi naman kasi anila kasama ang naturang gastusin sa retrieval at transport ng mga ballot boxes patungong Supreme Court compound kung saan isasagawa ang aktuwal na manual recount na hinihiling ng kampo ni Marcos.
By Jaymark Dagala
SMW: RPE
