Bahagyang bumilis ang bagyong Gorio papalabas ng bansa at nakaambang mag-landfall sa Taiwan.
Sa huling tala ng PAGASA o Philippine Atmospheric Geophysical and Astronomical Services Administration namataan ang bagyo sa layong 265 kilometro hilaga ng Basco, Batanes.
May taglay itong lakas na aabot sa 145 kilometers per hour malapit sa gitna at pagbugsong aabot sa 180 kilometers per hour.
Gumagalaw ang bagyo pa-hilagang kanluran sa bilis na 19 kilometers per hour.
Nakataas pa rin ang tropical storm warning signal number 1 sa Batanes Group of Islands.
Ayon sa PAGASA, paiigtingin pa rin ng bagyo at ng isa pang tropical depression sa labas ng Philippine Area of Responsibility o PAR ang habagat na magdadala ng katamtaman hanggang sa malakas na mga pag-ulan sa Northern at Central Luzon kasama na ang Metro Manila.
Inaasahang bukas ng umaga ay nasa labas na ng PAR ang bagyong Gorio.
—AR | DWIZ 882
