Ang mga Pilipinong walang working visa sa Qatar ang apektado ng diplomatic crisis sa naturang bansa.
Sinasabing maraming Pilipino ang nagta-trabaho sa Qatar ang may hawak ng tourist at business visa.
Kailangan umanong mag-exit sa ibang bansa ang mga ito para mabigyan ng working visa pagbalik ng Qatar.
Subalit hindi umano ito magawa ng mga nasabing Pinoy dahil sa flight ban.
Ang Bahrain at United Arab Emirates ang madalas na gamiting exit point ng mga Pilipino mula sa Qatar, subalit ang mga nasabing bansa ay kabilang sa mga pumutol ng diplomatic relations sa Qatar.
Sitwasyon sa Qatar: ‘Vey Normal’
“Very Normal” ang pagsasalarawan ng pinuno ng isang samahan ng mga OFW o Overseas Filipino Worker sa sitwasyon sa Qatar.
Ayon kay Engr. Ressie Fos, chairman ng United Filipino Overseas sa Qatar, wala namang pagkakaiba sa sitwasyon ng mga araw bago pa pumutok ang balitang pag urong ng diplomatic ties ng pitong (7) bansa sa Middle East sa Qatar.
Kinumpirma naman ni Fos ang panic buying sa mismong araw nang pagkalas ng ugnayan sa Qatar ng apat (4) na bansa noong Hunyo 5 subalit ito lamang aniya ay isang over reaction.
Kasabay nito, sinabi ni Fos na wala naman silang nakukuhang report na mawawalan ng trabaho ang mga OFW bilang resulta ng diplomatic crisis.
Inihayag ni Fos na sakali mang may mawalan ng trabaho, wala itong kaugnayan sa diplomatic crisis kundi dahil sa taghirap na aniya sa Qatar at ito ay nararanasan aniya nuong mga nakalipas na buwan pa.
By Judith Estrada – Larino