Labi ng Pilipinong kapitan na pinugutan ng ASG hinahanap pa

Patuloy na pinaghahanap ng mga tropa ng gobyerno ang katawan ng Filipino ship captain na pinugutan ng Abu Sayyaf sa Sulu.

Ayon kay Brig. General Cirilito Sobejana Jr., Commander ng Joint Task Force Sulu, umaasa silang mahahanap sa lalong madaling panahon ang labi ni Captain Noel Besconde upang maihatid ito sa kanyang nagluluksang pamilya.

Si Besconde ay kapitan at isa sa apat na tripulante ng barkong FB Ramona na dinukot ng Abu Sayyaf Group noong Disyembre ng nakaraang taon at pinugutan ng nitong Abril 13.

Kasabay nito, ipinangako rin ni AFP Chief of Staff General Eduardo Año na magpapatuloy ang kanilang operasyon upang masugpo ang bandidong grupo at mailigtas ang iba pa nitong mga bihag.

Dagdag pa ni Año, dahil sa panibagong pamumugot ng grupo, lalo nitong pinag-alab ang pagnanais ng militar na tuluyang matigil ang mga karahasang dulot ng Abu Sayyaf at maibalik ang kapayapaan sa Mindanao.

By  Drew Nacino | Krista de Dios

Comments

comments