Pinasisibak ni Davao City Mayor Sara Duterte ang hepe ng Task Force Davao at maging ang hepe ng Davao City Police matapos ang pagsabog sa night market sa lungsod noong Biyernes.
Sinabi ni Mayor Duterte na kulang ang naging aksyon nina Task Force Davao Chief Col. Henry Robinson at Davao Police Director Senior Supt. Michael John Dubria sa mga impormasyong natanggap ng mga ito bago naganap ang pagpapasabog sa night market.
Ito aniya ay bagamat wala namang kuwestyon sa kuwalipikasyon ng mga naturang opisyal.
Ayon pa kay Duterte, magkakaroon na sila ng problema sa kanilang working relationship kung mananatili sa kanilang tungkulin sina Robinson at Dubria at mas gusto ang mga bagong opisyal at bagong idea para sa Davao.
Ipinabatid ni Duterte na nagtalaga na siya ng bagong pinuno ng Task Force Davao subalit hinihintay pa niya ang rekomendasyon ni PNP Chief Director General Ronald ‘Bato’ Dela Rosa sa bagong Davao police chief.
By Judith Larino
Photo Credit: cnnph
