Inihirit ng grupong Laban Konsyumer sa DOE o Department of Energy na silipin at imbestigahan ang limang linggong sunud-sunod na pagtataas sa presyo ng mga produktong petrolyo ng mga kumpaniya ng langis.
Ayon kay Laban Konsyumer Convenor at dating Trade Undersecretary Victorio Dimagiba, dehado ang mga karaniwang motorista na naglalaan ng pondo para sa kanilang konsumo ng krudo kada araw.
Kinakailangan na aniyang magdagdag sa kanilang budget panggasolina ang mga motorista dahil umiksi na ang kanilang biyahe mula sa 500 Pisong average allotment dahil sa oil price hike.
Dahil dito, sinabi ni Dimagiba na dapat pagpaliwanagin na ng Energy Department ang mga kumpaniya ng langis sa serye ng oil price hike at hinimok din nila ang DOJ at Philippine Competition Commission na pumasok na rin sa usapin.
