(Ulat ni Jill Resontoc)
Sinampahan ng mga kasong kriminal at administratibo ni Senator Antonio Trillanes IV si Presidential Communications Office o PCO Assistant Secretary Mocha Uson.
Kasama ang abogado ay nagtungo ang senador sa opisina ng Ombudsman para isampa ang mga kaso laban kay Uson bandang alas-11:00 ngayong umaga.
Tatlong counts ng libel, falsification of documents, paglabag sa anti-graft and corrupt practices act at paglabag sa code of conduct and ethical standards ang mga kasong isinampa laban kay Uson.
Nag-ugat ang naturang mga kaso may kaugnayan sa pagpapakalat umano ni Uson ng “fake news” kaugnay sa mga sinasabing tagong yaman ng senador na umano’y nakalagay sa bank accounts nito sa Singapore.
“Hindi dapat pinapalagpas ang mga ganitong pamamahayag, maraming fake news sa ating bansa na dapat tutulan,” ayon kay Magdalo Representative Gary Alejano na isa sa rin sa mga kasama ni Trillanes sa pagsasampa ng kaso.
Matatandaang personal na pumunta sa DBS o Development Bank of Singapore si Trillanes upang patunayan na wala siyang account sa naturang bangko tulad ng naging pagbubunyag ng Pangulong Rodrigo Duterte.
Inamin naman ng Pangulo na talagang minali niya ang account number na sinabi niyang pagmamay-ari ni Trillanes sa Singapore.
Ayon sa Pangulo, wala talaga ang account number na una na niyang ibinunyag dahil produkto lamang ito ng kanyang imahinasyon.
Copy of case-affidavit filed by Antonio Trillanes | Photos via Cely Bueno
‘Teach her lesson’
By Krista de Dios
Iginiit ni Senador Antonio Trillanes na kailangang maturuan ng leksyon si Communications Assistant Secretary Mocha Uson.
Ito ang inihayag ng senador matapos niyang ipagharap sa patung-patong na kaso si Communications Assistant Secretary Mocha Uson sa Office of the Ombudsman.
Kabilang dito ang kasong adminitratibo para sa grave misconduct at anim na kasong kriminal para sa cyber libel, graft, paglabag sa code of conduct and ethical standards at falsification and used of falsified documents.
Ang mga nasabing kaso ay nag-ugat sa pagpapakalat ni Uson ng fake news kaugnay ng mga umano’y bank accounts ni Trillanes at patuloy na pagiging manager nito sa Mocha Girls.
—-