Posibleng ngayong araw lumabas sa kaniyang piitan sa PNP Custodial Center sa Kampo Crame si Senadora Leila de Lima para magtungo sa Philippine Heart Center upang ipasuri ang namataang bukol umano sa kaniyang atay.
Ito’y makaraang katigan ng Muntinlupa RTC o Regional Trial Court Branch 205 ang hirit na medical furlough ni De Lima na inihain pa noong Pebrero.
Bagama’t walang ibinigay na eksaktong oras ang korte hinggil sa kung kailan maaaring makalabas si De Lima, binigyang diin nito na isang araw lamang ang ibinibigay sa kaniya para makapagpatingin sa ispesyalista.
Kasunod nito, nakasaad din sa desisyon ng korte na sasagutin ni De Lima ang lahat ng gastusin sa kaniyang pagpapagamot kasama na rito ang gastos para sa lahat ng security detail ng PNP na sasama sa kaniya.
—-
