Nabunyag ang di umano’y planong pag-atake sa Davao City Jail upang itakas ang mga tinaguriang high value inmates kabilang na ang mga pinaghihinalaang terorista mula sa Maute Group.
Dahil dito, napag-alamang naghigpit na ng seguridad ang pamunuan ng Davao City Jail.
Napag-alamang mula sa mahigit 3,000 bilanggo sa Davao City Jail, lima (5) rito ang pinaghihinalaang terorista mula sa Maute Group, tatlo (3) ang miyembro ng Abu Sayyaf, labing walong (18) bilanggo ang nahaharap sa karumal-dumal na krimen, siyam (9) na pinaghihinalaang miyembro ng NPA at dalawang political prisoners.
Ang 5 miyembro di umano ng Maute Group ay mga suspects sa night market bombing sa Davao noong Setyembre ng nakaraang taon kung saan 14 katao ang nasawi.
Una nang hiniling ng Davao Peace and Order Council na malipat sa Metro Manila ang 5 miyembro ng Maute Group.
By Len Aguirre