Binalaan ng Philippine Drug enforcement Agency (PDEA) ang publiko laban sa mga nagpapanggap na kanilang anti illegal drug agents.
Kasunod ito ng pagkakaaresto sa isang lalaking nagpakilalang PDEA Agent at kasamahan nitong babae.
Kinilala ang mga ito na sina Jhay-R Repana at Rosemimi Facal na nasakote sa Sta. Rosa Laguna.
Ayon sa Parañaque City Police, kanilang nadakip ang dalawa matapos masangkot sa isang shooting incident sa Barangay BF Homes at kanilang nasundan sa Sta. Rosa.
Sa ginawang inspeksyon ng Parañaque Police sa sasakyan ng suspek, narekober dito ang isang kalibre 38 na baril na may mga bala at isang plastic sachet ng hinihinalang shabu.
Iginiit naman ng suspek na si Repana na isa siyang operatiba ng PDEA at nagpakita pa ito ng ID.
Gayunman itinanggi ni PDEA Director General Aaron Aquino na kabilang sa kanilang mga agents si Repana at iginiit na hindi niya hahayaang gamitin ng mga masasamang loob ang kanilang ahensya para sa mga iligal na gawain.
Hinimok din ni Aquino ang publiko na agad ipagbigay alam sa kanila ang mga kahinahinalang mga tao na nagpapanggap na mga PDEA agents.
RPE
