Lusot na sa ikatlo at huling pagbasa ang panukalang batas na naglalayong pabilisin ang proseso ng pagkuha ng permit para makapagnegosyo sa bansa.
Sa isinagawang sesyon sa Kamara kahapon, 225 mambabatas ang bumoto pabor sa House Bill 6579 o ang Ease of Doing Business Act.
Kung ganap na maisasabatas, magiging isang araw na lamang ang processing time para sa pagkuha ng business permit sa barangay level.
Habang bibilang naman ng tatlong araw ang pagpoproseso para sa simple application sa mga lokal na pamahalaan at ahensya ng pamahalaan habang sampung araw naman para sa complex application.
Samantala, 30 araw naman ang bibilangin ng mga business permit, clearances at accreditation kung mangangailangan ito ng technical evaluation.
—-