Kinumpirma ng Armed Forces of the Philippines o AFP ang ginawang pagdukot sa 10 Indonesian national na tripolante ng isang tugboat sa Tawi-Tawi noong gabi ng Sabado de Gloria.
Ayon kay Brigadier General Restituto Padilla, tagapagsalita ng AFP, ini-ulat sa kanila ng embahada ng Indonesia na may mga mamamayan silang nawawala at napaulat na nasa Pilipinas.
Batay sa nakuhang impormasyon ng AFP, sampu ang sakay ng tugboat na dinukot sa karagatang sakop ng Tawi-Tawi ng hindi pa matukoy na grupo.
Gayunman, may natatanggap nang impormasyon ang militar na Abu Sayyaf ang itinuturong nasa likod ng pagdukot bagama’t aminado si Padilla na hindi pa ito kumpirmado.
Ransom money
Nanghihingi umano ang mga kidnapper ng ransom money sa may-ari ng tugboat kung saan nabihag ang may 10 Indonesian national na sakay nito.
Batay ito sa nakuhang impormasyon ng Armed Forces of the Philippines o AFP bagama’t hindi pa matukoy kung magkano ang hinihinging halaga ng mga kidnapper.
Kasunod nito, nakiusap si AFP Spokesman Brig. Gen. Restituto Padilla sa may-ari ng tugboat na makipag-ugnayan muna sa kanila.
Ito’y upang mailatag ang mga kinakailangang hakbang para masagip ang mga dinukot na Indonesian nationals.
Sa ngayon ani Padilla, nasa pantalan ng Tawi-Tawi ang narekober na tugboat na may mga markings na Brahma12 at Jakarta YDB 341 na sinasabing registry number ng abandonadong tugboat.
Pinatitiyak din ni Armed Forces of the Philippines o AFP Chief of Staff Hernando Irriberi sa mga security cluster sa Mindanao na iberipikang maigi ang mga nakukuhang impormasyon mula sa mga sibilyan at iba pang sources.
Ayon kay Brigadier Gen. Restituto Padilla, may mga high level talks nang nagaganap sa pagitan ng dalawang bansa.
Kahapon, tumungo si Iriberri sa Zamboanga upang personal na alamin at tingnan ang sitwasyon gayundin ay tutukan ang pagkalap ng impormasyon hinggil dito.
Ipinauubaya na rin ng Indonesian Embassy sa Department of Foreign Affairs ng Pilipinas gayundin sa pulisya, militar at Coast Guard ang pagkalap ng impormasyon sa insidente.
By Jaymark Dagala | Jonathan Andal (Patrol 31)
