Pinalitan na ng Land Transportation Office (LTO) ng “No Registration, No Travel,” policy ang kanilang dating patakarang “no plate, no travel.”
Sinabi ni Sen. JV Ejercito na tiniyak sa kanila ni LTO Asst. Secretary Alfonso Tan nang humarap sa pagdinig ng Senate Blue Ribbon Commitee ukol sa isyu ng manipis na suplay ng plaka sa ahensya na ibinasura na ng ahensya ang no plate, no travel policy.
Inatasan na rin anya nina Senate President Pro Tempore Ralph Recto at Sen. Alan Cayetano ang LTO at LTFRB na bawiin ang Joint Administrative Order (JAO) na nagtatakda ng P5,000 multa sa mga sasakyang mahuhuling nagbibiyahe nang walang plaka.
Nangako naman umano si Tan na magkakasa ang LTO ng press briefing upang abisuhan ang mga traffic enforcer ukol sa bagong “No Registration, No Travel” policy.
By Mariboy Ysibido
