MPD naka-full alert status na para sa Eid’l Fitr bukas

Naka-full alert status na ang Manila Police District para sa pagdiriwang ng Eid’l Fitr o pagtatapos ng Ramadan sa Maynila bukas June 26.

Ayon kay MPD spokesman Supt. Edwin Margarejo, madaling araw pa lamang kanina ay kanila nang itinalaga ang nasa limang daang pulis.

Ito ay para magbigay seguridad sa Quirino Grandstand at Golden Mosque kung saan inaasahang isasagawa ang malalaking pagitipon ng mga Muslim.

Sinabi pa ni Margarejo na bukod sa mga uniformed personnel ay magpapakalat din sila ng mga naka sibilyang pulis na tutulong sa pagmamatiyag.

Kaugnay nito, tiniyak ni Margarejo na nakahanda sila sa anumang klaseng senaryo na posibleng mangyari bagamat wala pa silang namomonitor na banta sa maynila para sa araw ng Eid’l Fitr.

Libu-libong Muslim, dagsa na sa Quirino Grandstand para sa pagtatapos ng Ramadan

Nagsimula nang dumagsa ang libu-libong mga Muslim sa Quirino Grandstand para sa pagdiriwang ng Eid’l Fitr o pagtatapos ng Ramadan.

Unang inaasahang papatak ang Eid’l Fitr bukas June 26, pero isinagawa ang pagtitipon ngayong araw matapos makita ang buwan kagabi na  hudyat ng pagtatapos ng tatlumpung araw na pag-aayuno ng mga Muslim.

Nagmula sa iba’t ibang bahagi ng Metro Manila at kalapit na mga lalawigan ang mga Muslim na dumagsa sa Quirino Grandstand para manalangin.

By Krista De Dios

Comments

comments