Nanawagan ang Office of the Civil Defense (OCD-11) sa mga naninirahan sa Davao Region na maging kalmado at manatiling nakaantabay sa mga kinauukulang ahensya ng gobyerno para sa mga updates hinggil sa lagay ng panahon.
Ginawa ng OCD-11 ang paalala, matapos na bawiin na ng Philippine Institute of Volcanology and Seismology (PHIVOLCS) ang tsunami warning kasunod ng magnitude 7.2 na lindol na tumama sa ilang lugar ng Mindanao.
Sinabi ni Region 11-OCD spokesperson Franz Irag, wala namang napaulat na napinsala sa nangyaring lindol subalit patuloy aniya silang naka-monitor sa mga ibibigay na anunsyo ng mga tanggapan pamahalaan.
Sa ngayon, wala na aniyang dapat na ikabahala ang mga taga Davao Oriental, partikular na ang mga naninirahan sa mga baybaying dagat matapos ang nangyaring pagyanig sa bahagi ng Pundangitan, Governor Generoso.
Una nang sinabi ng OCD-11 na patuloy na makararanas ng mga aftershocks ang mga lugar sa Davao Region.
