Nabuhayan ng loob ang mga pamilya at biktima ng naganap na aksidente sa Tanay na kinasasangkutan ng mga estudyante ng BestLink College.
Ito ay matapos na i-reject ng Quezon City Regional Trial Court ang mosyon ng Panda Coach Tourist and Transport Incorporated at Haranah Tours Corporation sa hirit na ibasura ang damage suit na inihain ng mga biktima.
Ayon kay Ariel Inton ng Lawyer’s for Commuter’s Safety and Protection, grupong tumutulong sa mga biktima, hindi sila titigil hangga’t hindi napapanagot ang Panda Couch at Haranah Tours na syang may-ari ng bus na ginamit sa field trip at maging ang paaralan na BestLink.
Aniya, pagpapakita ito na kahit na mahirap ay maaring magsampa ng kaso para makamit ang hustisya.
Sa inihaing kaso, humirit ang limang (5) survivor ng moral at exemplary damages ng hindi bababa sa isang (1) milyong piso kada isa.
Matatandaang labing lima (15) katao ang namatay habang 40 ang sugatan sa nangyaring aksidente sa Tanay noong Pebrero 20 ngayong taon.
By Rianne Briones
